အာဆင်နယ်နှင့် မန်စီးတီးအသင်းတို့သည် ယခုရာသီတွင် ပရီးမီးယားလိဂ်ချန်ပီယံဆုအတွက် အပြိုင်ဖြစ်နေသည်။ အာဆင်နယ်အသင်းသည် ပရီးမီးယားလိဂ်အမှတ်ပေးဇယားတွင် 29 ပွဲကစား၊ ရမှတ် 72 မှတ်ဖြင့် ဦးဆောင်နေပြီး ဒုတိယနေရာမှ မန်စီးတီး (28 ပွဲကစား၊ ရမှတ် 63 မှတ်) ကို 8 မှတ်ဖြတ်ကာ ဦးဆောင်နေသည်။
ယခုရာသီ ပရီးမီးယားလိဂ် အမှတ်ပေးဇယားထိပ်ဆုံးမှ ဦးဆောင်နေသည့် အာဆင်နယ်အသင်းတွင် အင်္ဂလန်တိုက်စစ်ကစားသမား ဆာကာ ခြေစွမ်းပြကစားနေပြီး ယခုရာသီ ပြိုင်ပွဲစုံ ၃၈ ပွဲ တွင် ၁၃ ဂိုးသွင်းယူထားသလို ပရီးမီးယားလိဂ် ၂၈ ပွဲတွင် ၁၂ ဂိုး သွင်းယူထားသည်။ ဖိုဒန်မှာမူ ယခုရာသီတွင် မန်စီးတီးအသင်း၌ ပုံမှန်ပွဲထွက်ခွင့်ရရန် ရုန်းကန်နေရပြီး ပရီးမီးယားလိဂ် ၂၄ ပွဲသာ ကစားခွင့်ရထားကာ ၉ ဂိုးသွင်းယူထားသည်။
ထို့ပြင် ဆာကာသည် အင်္ဂလန်လက်ရွေးစင်အသင်းတွင်လည်း ပုံမှန်ပွဲထွက်ခွင့် တစ်နေရာအပိုင်ရထားပြီး ဖိုဒန်မှာမူ အရန်ကစားသမားအဖြစ် ကစားခွင့်ရနေသည်။ ဖိုဒန်သည် အသက် ၂၂ နှစ်ရှိပြီဖြစ်သော်လည်း အသက် ၂၁ နှစ်သာရှိသေးသည့် ဆာကာထံမှ သင်ယူနေကြောင်း ဝန်ခံပြောကြားခဲ့ခြင်းဖြစ်သည်။
Evening Standard သတင်းစာနှင့် တွေ့ဆုံရာတွင် ဆာကာနှင့်ပတ်သက်ပြီး မေးမြန်းရာ ဖိုဒန်က “ကျွန်တော့်အနေနဲ့ ဆာကာဆီက သင်ယူလေ့လာနေပါတယ်။ သူ့အနေနဲ့ ပယ်နယ်တီလွဲခဲ့တာကို (အီတလီအသင်းကို ပယ်နယ်တီဖြင့် ရှုံးနိမ့်ခဲ့သည့် ယူရို-၂၀၂၀ ဗိုလ်လုပွဲတွင် အဆုံးအဖြတ်ပယ်နယ်တီ လွဲခဲ့ခြင်း) ပြောင်းပြန်လှန်ပစ်နိုင်ခဲ့တယ်။ အဲဒီပယ်နယ်တီလွဲပြီးနောက် ကလပ်အသင်းနဲ့ နိုင်ငံအသင်းအတွက် ဆာကာရဲ့ စွမ်းဆောင်မှုက အံ့သြစရာကောင်းပါတယ်။ သူက လူကောင်းတစ်ယောက်ဖြစ်ပြီး သူ့ကို လူတိုင်းချစ်ကြပါတယ်”ဟု ပြောကြားခဲ့သည်။
ထို့ပြင် ဖိုဒန်က အာဆင်နယ်အသင်းနှင့် ပရီးမီးယားလိဂ်ချန်ပီယံဆုအတွက် အပြိုင်ဖြစ်နေသော်လည်း ဆာကာ ခြေစွမ်းပြနိုင်သည့်အတွက် ဝမ်းသာကြောင်းလည်း ပြောကြားခဲ့သည်။ ၎င်းက ဆာကာအနေဖြင့် ယခုမှ အသက် ၂၁ နှစ်သာရှိသေးသဖြင့် များစွာ တိုးတက်လာဦးဖြစ်ကြောင်းနှင့် ယခုရာသီတွင် အာဆင်နယ်နှင့် နိုင်ငံအသင်းအတွက် ခြေစွမ်းပြနေသည့် ဆာကာအတွက် ဝမ်းသာကြောင်း ပြောကြားခဲ့သည်။
