အာဆင်နယ်ဂန္ထဝင်နည်းပြကြီး အာစင်ဝင်းဂါးက မိမိ၏ အာဆင်နယ် နည်းပြဘဝတွင် နောင်တအရဆုံး လူအင်အားဖြည့်တင်းမှုသည် စီရော်နယ်လ်ဒိုကို မခေါ်ယူနိုင်ခဲ့ခြင်းဖြစ်ပြီး ၎င်းသည် အသင်းထံ ပြောင်းရွှေ့ရန် အလွန်နီးစပ်ခဲ့သည်ဟု Guardian သတင်းစာနှင့် အင်တာဗျူးတွင် ဖွင့်ဟပြောကြားခဲ့သည်။
အာစင်ဝင်းဂါးသည် အသစ်ထွက်ရှိသည့် ၎င်း၏ အတ္တုပ္ပတ္တိစာအုပ်နှင့်ပတ်သက်၍ အင်တာဗျူးများ ပြုလုပ်နေခြင်းဖြစ်ပြီး Guardian က ပြုလုပ်သည့်အစီအစဉ်တွင် ကမ္ဘာတစ်ဝန်းမှ နာမည်ကျော်ပုဂ္ဂိုလ်များစွာနှင့် စာဖတ်ပရိသတ်များ ပါဝင်မေးမြန်းခဲ့ကြသည်။
၂၀၀၃ နွေရာသီတွင် စီရော်နယ်လ်ဒိုအား ခေါ်ယူနိုင်ရန် နီးစပ်ခဲ့ပြီးမှ မန်ယူအသင်း၏ ကြားဖြတ်လုယူမှုခံခဲ့ရခြင်းအပေါ် အာစင်ဝင်းဂါးက “နောင်တရစရာက တစ်ယောက်မကဘူး။ အယောက် (၅၀)လောက်ရှိတယ်။ နောင်တအရဆုံးဂုဏ်ပုဒ်နဲ့ နီးစပ်တာက စီရော်နယ်လ်ဒိုလို့ ပြောရမယ်။
သူ မန်ယူအသင်းကို ပြောင်းရွှေ့သွားတဲ့အချိန်မှာပေါ့။ ကျွန်တော်တို့က စပို့တင်းလစ္စဘွန်းနဲ့ သဘောတူညီမှုရခဲ့ပြီးသားပါ။ ဒါပေမဲ့ မန်ယူက ကားလို့စ်ကွီရော့ဇ်ကို လက်ထောက်အဖြစ် ခန့်အပ်ခဲ့ပြီး အဲဒီနောက် သူတို့က လျင်လျင်မြန်မြန် စီရော်နယ်လ်ဒိုကို လုယူသွားတော့တာပဲ။
ဒါပေမဲ့ ကျွန်တော်တို့နဲ့ စီရော်နယ်လ်ဒို အခြေခံအားဖြင့် သဘောတူညီမှုရခဲ့ပါတယ်။ သူ အာဆင်နယ်ဂျာစီကိုတောင် ရယူပြီးပါပြီ။ လေ့ကျင့်ရေးကွင်းမှာ သူရယ်၊ သူ့အမေရယ်၊ ကျွန်တော်ရယ် နေ့လယ်စာလည်း စားခဲ့ပါတယ်” ဟု ဆိုခဲ့သည်။
