မန်ယူအသင်းနည်းပြ အဲရစ်တန်ဟက်က အသင်းအားဝယ်ယူရန် ကမ်းလှမ်းထားသူ ဗြိတိန်ဘီလျံနာ ဆာဂျင်ရက်ကလစ်ဖ်နှင့်တွေ့ ဆုံခဲ့ကြောင်း အတည်ပြုပြောကြားသည်။
INEOS ဓာတုလုပ်ငန်းကုမ္ပဏီ၏ ဥက္ကဋ္ဌနှင့် အမှုဆောင်ချုပ်ဖြစ်သူ ရက်ကလစ်ဖ်ဦးဆောင်သည့် အဖွဲ့ဝင်များသည် သောကြာနေ့ နံနက်ပိုင်းက အိုးလ်ထရက်ဖို့ဒ်ကွင်းသို့ သွားရောက်ခဲ့ပြီး မန်ယူအသင်းအမှုဆောင်ချုပ် ရစ်ချက်အာနိုးလ်နှင့်တွေ့ဆုံ၍ အသင်းအား ဝယ်ယူမည့်ကိစ္စများကို ညှိနှိုင်းဆွေးနွေးခဲ့ကြသည်။
ထို့နောက် ရက်ကလစ်ဖ်သည် ကာရင်တန်လေ့ကျင့်ရေးကွင်းသို့ သွားရောက်လည်ပတ်ခဲ့ပြီး အဲရစ်တန်ဟက်က ဧည့်ခံတွေ့ ဆုံ၍ နှုတ်ဆက်ခဲ့ခြင်းဖြစ်သည်။
“ကျွန်တော် သူတို့နဲ့တွေ့ပြီး လက်ဆွဲနှုတ်ဆက်ခဲ့ပါတယ်။ ပွဲအတွက်ပဲ ကျွန်တော် အာရုံစိုက်ထားပါတယ်။ တနင်္ဂနွေနေ့မှာ ကျွန်တော်တို့ ပွဲကြီးတစ်ပွဲကစားရမှာပါ။ ကျွန်တော်တို့အားလုံး အဲဒီပွဲကိုပဲ အာရုံစိုက်ထားပါတယ်။ အသင်းမှာရှိတဲ့ တခြားသူတွေက ရင်းနှီးမြှုပ်နှံဖို့ အလားအလာရှိသူတွေနဲ့ ဆွေးနွေးမှုတွေ လုပ်နေကြပါတယ်။ ဒီအချိန်မှာ ကျွန်တော့်အလုပ်က ပွဲကို အာရုံစိုက်ထားဖို့ပါ။ အဲဒါကြောင့် ပွဲအကြောင်းကိုပဲ ပြောကြရအောင်။ ဒါက ကောင်းမွန်တဲ့တွေ့ဆုံမှုဖြစ်ပြီး အဲဒီပွဲအတွက် အဆင်သင့်ဖြစ်အောင် ပြင်ဆင်ထားပါတယ်” ဟု တန်ဟက်က ပြောကြားခဲ့သည်။
